Vom Herr Kugel igleitet und organisiert
hemmer Mäntig und Zistig alles prepariert
um am Mittwuch am Cortège (Umzug) teilznäh
hemmer bim Bastle wirklig alles gäh.
Am Mittag hemmer uns ufe Weg gmacht zum uf Basel zgo
und wär hättis denkt… d’Sunne het uns scho am Bahnhof in Empfang gno.
So het das ohni z’friere no viel meh Spass gmacht
und mir hend Räppli (Konfetti) umegworfe und viel glacht.
Da Nomittag isch e mega Highlight gsi
und wird uns no lang e tolli Erinnerig sii.
Viele Dank nomol an d’Wurzle-Clique
mir düen euch an däre Stell nomol e grosses Merci schigge!
Am Donstig hemmer no glernt e Clique und e Gugge z’unterscheide
und chönne uns langsam Fasnachtskenner nenne, ganz bescheide.
Au hemmer Zeedel greimt und Laterne gmolt…
bis s’Endi vo de Wuche uns scho wieder het igholt.
Zum Schluss hets Chäswaie und Mählsuppe gäh
und bim Basler Schoggitorf het niemert gseit wäh!
Wer weiss, vielleicht sind paar Nase cho ufe Gschmack
und au sie hets Basler Fasnachtsfieber packt!